O Master, especie en extición

Continuando coa liña de post que veño facendo, vamos prestarlle especial atención á figura principal dunha partida de rol, o master.

Por que?, vos preguntaredes. Pois ben, porque metres que para ser xogador só fan falla ganas de divertirse e imaxinación, para master fai falla ademais dedicación.

Sen master non hai partida (isto xeneraliza tamén en que sen partida non hai master, volveremos a ese razoamento máis tarde) xa que é el o encargado de escribir, organizar e motiva-los xogadores, ademais de ser o que está obrigado as misións de loxística e presentación. O master, aínda que non sempre, é o encargado de reunir a xogadores que non se coñecen entre si, e SEMPRE é o encargado de soluciona-los problemas que aparezan entre os mesmos.

Deste xeito, as obrigas son moitas e variadas, así que atopar un master é un tesouro; deses que se atopan custodiados por un exército de orcos, dragóns, un demonio e un feiticeiro louco, todo á vez. Pero aínda que poida parecer abrumador, non acaba por ser tan extenuante. Os apartados bós que ten este traballo veñen dados na expresión de creatividade, na sensación de poder, e na inexplicable sensación producida cando os demais se divirten coas túas creacións.

Non é tan difícil ser master, pero é algo que non se lle pode dicir ós teus xogadores se queres manter esa posición dominante ( e créeme, PRECISAS esa posición).

Realmente, só é un problema de tempo. Tempo para ler os inconmensurables libros de regras (que non hai que memorizar, pero nos que tes que saber como buscar), tempo para imaxinar e escribir, e por último tempo para xogar; fronte ós teus xogadores que só requiren do tempo para xogar, pero que aínda así che porán pegas para facelo.

Visto o artigo, coido que ningún lector quere ser master, e incluso os que xa o fosen (e rogo comentedes para pornos en contacto, que preciso estrear uns dados novos) seguro que están a arrepentirse. Por que entón segue a haber masters? Basicamente é por cabezonería (cantas veces masters fartos acaban por chegar á conclusión de que a partida se xoga ou se xoga, e punto), pero como segundas razóns están a expresión da creatividade (tes todo un mundo que imaxinar, dende onde están os mares e cordilleiras ate a que divinidade rogan os crédulos do teu mundo), a diversión de propoñer retos ós teus xogadores ( aquí entran desde as criaturas máis horripilantes que existen ata as adiviñanzas máis clásicas) e a sensación de poder que supón ser máis que o deus dese mundo.

Así que se che gusta escribir, propoñer diversións e tes certas dotes histriónicas de representación (a grandilocuencia é parte do teu papel cando representas o mundo), anímote a que emprendas este camiño, posto que se probas, de seguro que che ha gustar. E por certo, se buscas xogadores, aquí estou!!

Agardo con impaciencia comeza-las críticas dos xogos para que poidades saber con cal empezar.

Sen máis despedirme, que teño que marchar limpar un dungeon. Vémonos na taberna na próxima lúa, se sobrevivo...

Inicio e presentación

Boas a todos!


Estades perante un blog a medio facer... en realidade estades a ve-los seus primeiros pasos. Con esta entrada pretendo darvos a benvida a un intento por aumentar o mundo friki en Ourense, que moi o meu pesar e ós dos meus amigos, cada día parece que languidece e se aproxima irremesiblemente a súa desaparición. Ante esta penosa situación, pretendemos abri-la cultura desta cidade a un mundo esquecido, odiado e repudiado na maior parte dos ámbitos, pero que queiramos ou non forma parte de nós.


Todos somos frikis, e iso é bó.


Non o afirmo á lixeira. Todos temos unha afición denostada polo grande público, un anhelo de información sobre un determinado campo que só se solventa en reducidos e pechados círculos, en Avernos ocultos ós ollos da creación (e aquí se demostra que o título do benquerido blog non é ó azar). Para solucionar esa necesidade de cultura extraña ou oculta ós grandes canais, estaremos nós.


Os autores deste blog comprometémonos a informar sobre temas tan dispares como literatura, cinefilia ou xogos en tódolos soportes, de mesa, tradicionais, videoxogos ou a estrela, o Rol. Nese senso, pouco a pouco irémosvos descubrindo este mundillo tan absorbente.
Como non todo na vida dun friki é falar de libros, pelis e xogos, tamén nos preocuparemos de publicar noticias, da nosa cidade e de fóra, sobre calquera tema relacionado coa etiqueta friki.


Sen máis, benvidos, agardamos de todo corazón que sexamos de utilidade e que logremos contribuír ó mantemento e crecemento do mundo friki ourensán.


Que a forza vos acompañe